ఏపీలోని నాలుగు ప్రభుత్వ ఐటీఐల ఆధునీకరణ దిశగా అడుగులు… చారిత్రక ఒప్పందం

ప్రధానమంత్రి నైపుణ్యాభివృద్ధి, ఉపాధి సామర్థ్యాల పెంపు కోసం ప్రభుత్వ ఐటీఐలను ఆధునీకరించే ప్రతిష్టాత్మక పథకం ‘పీఎం-సేతు’ (PM-SETU) కింద విశాఖపట్నం క్లస్టర్‌లోని నాలుగు ప్రభుత్వ పారిశ్రామిక శిక్షణ సంస్థల (ITIs) ఆధునీకరణకు కీలక అడుగు పడింది. ప్రముఖ అంతర్జాతీయ ఉక్కు దిగ్గజాలైన ఆర్సెలర్ మిట్టల్ , నిప్పాన్ స్టీల్ సంయుక్త సంస్థ ఆర్సెలర్ మిట్టల్ నిప్పాన్ స్టీల్ ఇండియా (AM/NS ఇండియా).. భారత ప్రభుత్వం, ఆంధ్రప్రదేశ్ ప్రభుత్వంతో కలిసి అధికారికంగా వాటాదారుల ఒప్పందం (Shareholders’ Agreement – SHA) కుదుర్చుకుంది.

ఈ ఒప్పందంతో ఆమోదం పొందిన పెట్టుబడి ప్రణాళిక అమలుకు ఏఎం/ఎన్ఎస్ ఇండియా, కేంద్ర ప్రభుత్వం, ఆంధ్రప్రదేశ్ ప్రభుత్వం కలిసి ముందుకు సాగే కార్యాచరణ ఖరారైంది. తదుపరి దశలో ఈ నాలుగు ఐటీఐల ఆధునీకరణ , రోజువారీ నిర్వహణ బాధ్యతలను చేపట్టేందుకు ఒక ప్రత్యేక ప్రయోజన సంస్థను (SPV) ఏర్పాటు చేయనున్నారు. ఈ భాగస్వామ్యంలో ఏఎం/ఎన్ఎస్ ఇండియా అత్యధికంగా 51 శాతం వాటా కలిగి ఉండగా, కేంద్ర ప్రభుత్వం , ఆంధ్రప్రదేశ్ ప్రభుత్వాలు చెరో 24.5 శాతం వాటాలను పంచుకోనున్నాయి.

రూ.200 కోట్ల ప్రాజెక్టు

నాలుగు ఐటీఐలలో శిక్షణ సదుపాయాలు, నవీకరించిన కోర్సులు, బోధనా ప్రమాణాలను ఉన్నత స్థాయికి చేర్చడంలో ఈ ఒప్పందం అత్యంత కీలకంగా నిలవనుంది. పీఎం-సేతు పథకం కింద నేషనల్ స్టీరింగ్ కమిటీ ఆమోదం దక్కించుకున్న మొట్టమొదటి వ్యూహాత్మక పెట్టుబడి ప్రణాళికగా విశాఖపట్నం క్లస్టర్ రికార్డు సృష్టించింది. మొత్తం రూ.200 కోట్ల ఆమోదిత వ్యయంతో చేపట్టనున్న ఈ ప్రాజెక్టు ద్వారా స్థానిక యువతకు ఉపాధి అవకాశాలను మెరుగుపరచడమే లక్ష్యంగా పెట్టుకున్నారు. ఆధునిక ల్యాబ్‌లు, పరిశ్రమల అవసరాలకు తగ్గ పాఠ్యాంశాలు, సమగ్ర ప్రాయోగిక శిక్షణ ద్వారా తయారీ రంగంతో పాటు సంబంధిత పరిశ్రమల్లో మెరుగైన ఉద్యోగాలు సాధించేలా విద్యార్థులను తీర్చిదిద్దనున్నారు.

యువతకు పరిశ్రమల స్థాయి నైపుణ్యాలు: మంత్రి నారా లోకేశ్

ఈ చారిత్రక ఒప్పందంపై ఆంధ్రప్రదేశ్ ప్రభుత్వ ఐటీ, ఎలక్ట్రానిక్స్ అండ్ కమ్యూనికేషన్స్, మానవ వనరుల అభివృద్ధి (HRD), రియల్ టైమ్ గవర్నెన్స్ శాఖల మంత్రి శ్రీ నారా లోకేశ్ స్పందిస్తూ, “ఆంధ్రప్రదేశ్‌లో పారిశ్రామిక ప్రగతి రాష్ట్ర యువతకు విస్తృత అవకాశాలను అందించేలా చూడటమే తమ ప్రభుత్వ ప్రధాన ప్రాధాన్యత” అని స్పష్టం చేశారు. ఏఎం/ఎన్ఎస్ ఇండియాతో కుదిరిన భాగస్వామ్యం ద్వారా నాలుగు ప్రభుత్వ ఐటీఐల విద్యార్థులకు ఆధునిక పరిశ్రమలు కోరుకునే నాణ్యమైన ప్రాయోగిక నైపుణ్యాలు అందుతాయన్నారు. శిక్షణ సదుపాయాలను మెరుగుపరచడం, సాంకేతిక విద్యలో పరిశ్రమల అనుభవాన్ని నేరుగా జోడించడం ద్వారా యువతలో ఉపాధి సామర్థ్యాన్ని పెంచి, రాష్ట్రాభివృద్ధిలో వారిని క్రియాశీలక భాగస్వాములను చేయడమే తమ ధ్యేయమని ఆయన తెలిపారు.

స్థానిక మానవ వనరుల బలోపేతమే లక్ష్యం: అశుతోష్ తెలాంగ్

ఏఎం/ఎన్ఎస్ ఇండియా డైరెక్టర్ & వైస్ ప్రెసిడెంట్ (హెచ్‌ఆర్ అండ్ అడ్మినిస్ట్రేషన్) అశుతోష్ తెలాంగ్ మాట్లాడుతూ, ఆంధ్రప్రదేశ్ యువత ఉపాధి సామర్థ్యాన్ని పెంచేందుకు తాము పూర్తి నిబద్ధతతో ఉన్నామని పేర్కొన్నారు. తమ సంస్థకు తయారీ రంగంలో ఉన్న సుదీర్ఘ అనుభవాన్ని, అలాగే సాంకేతిక విద్యా భాగస్వామి అయిన ‘నామ్‌టెక్’ (NAMTECH) నైపుణ్యాన్ని ఈ నాలుగు ఐటీఐలకు జోడిస్తామని చెప్పారు. మెరుగైన మౌలిక సదుపాయాలు, పరిశ్రమల స్థాయి ప్రత్యక్ష శిక్షణ, అధ్యాపకులకు ప్రత్యేక శిక్షణ అందించడం ద్వారా తయారీ , అనుబంధ రంగాల్లోని ఉద్యోగాలకు విద్యార్థులు సంపూర్ణంగా సిద్ధమవుతారని, తద్వారా స్థానిక నైపుణ్యవంతమైన మానవ వనరులు మరింత బలోపేతం అవుతాయని ఆయన వెల్లడించారు.

నామ్‌టెక్ సహకారంతో సమగ్ర మార్పులు

ఏఎం/ఎన్ఎస్ ఇండియా తన విద్యా , సాంకేతిక భాగస్వామి అయిన న్యూ ఏజ్ మేకర్స్ ఇన్‌స్టిట్యూట్ ఆఫ్ టెక్నాలజీ (NAMTECH) సహకారంతో ఈ మొత్తం ప్రాజెక్టును క్షేత్రస్థాయిలో అమలు చేయనుంది. ఈ ప్రాజెక్టు కింద శిక్షణ మౌలిక సదుపాయాల సమూల ఆధునీకరణ, ప్రస్తుతం ఉన్న కోర్సుల నవీకరణ, మార్కెట్ అవసరాలకు తగ్గ కొత్త ట్రేడ్‌ల ప్రవేశం, అధ్యాపకులకు అధునాతన శిక్షణ వంటి కార్యక్రమాలు చేపట్టనున్నారు. ఈ మార్పుల ద్వారా విద్యార్థులు పరిశ్రమల్లో నేరుగా ఉపయోగించే అత్యాధునిక యంత్రాలు, పద్ధతులపై శిక్షణ పొందే అవకాశం దక్కుతుంది. తరగతి గదిలో నేర్చుకున్న సిద్ధాంతాలను వాస్తవ పరిశ్రమ పనుల్లో ఎలా అన్వయించాలో ప్రత్యక్షంగా గ్రహించి, సాంకేతిక పనులలో పూర్తి ఆత్మవిశ్వాసాన్ని పొందగలుగుతారు. అధ్యాపకులకు కూడా సాంకేతిక పరిజ్ఞానం, ఆధునిక బోధనా మెలకువలపై ప్రత్యేక శిక్షణ ఇవ్వనున్నారు.

విశాఖపట్నం క్లస్టర్‌లోని నాలుగు ఐటీఐల వివరాలు

ఈ ప్రాజెక్టు కింద విశాఖపట్నం క్లస్టర్‌లోని నాలుగు ప్రభుత్వ ఐటీఐలను సమగ్రంగా తీర్చిదిద్దనున్నారు:
1. ప్రభుత్వ ఐటీఐ (పాతది), కంచరపాలెం
2. ప్రభుత్వ ఐటీఐ (బాలికలు), ఇండస్ట్రియల్ ఎస్టేట్, విశాఖపట్నం
3. ప్రభుత్వ ఐటీఐ, బొబ్బిలి
4. ప్రభుత్వ ఐటీఐ, నర్సీపట్నం

వీటిలో కంచరపాలెం ఐటీఐ ప్రధాన నోడల్ కేంద్రంగా పనిచేస్తూ, మిగిలిన మూడు సంస్థలకు ఉమ్మడి సదుపాయాలు, వనరులను సమకూర్చడంలో కీలక సమన్వయకర్తగా వ్యవహరిస్తుంది. ఐటీఐ శిక్షణను పరిశ్రమల డిమాండ్‌కు అనుగుణంగా మార్చడం ద్వారా అటు విద్యార్థులకు వేగంగా ఉద్యోగాలు దక్కడంతో పాటు, ఇటు పరిశ్రమలకు నైపుణ్యమున్న నిపుణులు అందుబాటులోకి వస్తారు. ఆంధ్రప్రదేశ్‌లో పరిశ్రమలు వేగంగా విస్తరిస్తున్న ప్రస్తుత తరుణంలో స్థానిక సాంకేతిక ప్రతిభను తీర్చిదిద్దడంలో ఇది కీలక పాత్ర పోషించనుంది.

దేశవ్యాప్త పీఎం-సేతు పథకం , గుజరాత్ ఒప్పందం

పీఎం-సేతు పథకం కింద ఏఎం/ఎన్ఎస్ ఇండియా కుదుర్చుకున్న రెండు వేర్వేరు వాటాదారుల ఒప్పందాల్లో ఆంధ్రప్రదేశ్ ఒకటి కాగా, రెండో ఒప్పందం గుజరాత్‌లోని సూరత్ క్లస్టర్‌లో ఐదు ప్రభుత్వ ఐటీఐల ఆధునీకరణకు సంబంధించినది. ఈ రెండు రాష్ట్రాల్లోని ప్రాజెక్టుల ద్వారా మొత్తం తొమ్మిది ఐటీఐలు సమగ్రంగా అభివృద్ధి చెందనుండగా, వీటికి కలిపి రూ.440 కోట్ల పెట్టుబడికి ఆమోదం లభించింది. కేంద్ర ప్రభుత్వం చేపట్టిన ‘పీఎం-సేతు’ పథకం మొత్తం రూ.60,000 కోట్ల భారీ వ్యయంతో కూడినది. పరిశ్రమల ప్రత్యక్ష భాగస్వామ్యంతో దేశవ్యాప్తంగా 1,000 ప్రభుత్వ ఐటీఐలను ఆధునీకరించడం, ఐదు జాతీయ నైపుణ్య శిక్షణ సంస్థలను (NSTIs) బలోపేతం చేయడమే ఈ జాతీయ పథకం ముఖ్య లక్ష్యం.

ఏఎం/ఎన్ఎస్ ఇండియా ప్రస్థానం

ఆర్సెలర్ మిట్టల్ నిప్పాన్ స్టీల్ ఇండియా (AM/NS ఇండియా) అనేది ప్రపంచంలోని అగ్రగామి ఉక్కు తయారీ సంస్థలైన ఆర్సెలర్ మిట్టల్, నిప్పాన్ స్టీల్‌ల ఉమ్మడి సంస్థ. భారతదేశంలో ప్రముఖ ఇంటిగ్రేటెడ్ ఫ్లాట్ కార్బన్ స్టీల్ ఉత్పత్తిదారుల్లో ఒకటైన ఈ కంపెనీ, సంవత్సరానికి 9 మిలియన్ టన్నుల ముడి ఉక్కు ఉత్పత్తి సామర్థ్యాన్ని కలిగి ఉంది. అత్యాధునిక డౌన్‌స్ట్రీమ్ యూనిట్లతో పాటు విలువ ఆధారిత ఫ్లాట్ స్టీల్ ఉత్పత్తులను తయారు చేస్తోంది. ఈ సంస్థకు ఏటా 20 మిలియన్ టన్నుల పెల్లెట్ ఉత్పత్తి సామర్థ్యం ఉంది. ప్రస్తుతం ఆంధ్రప్రదేశ్‌లో సంవత్సరానికి 8.2 మిలియన్ టన్నుల సామర్థ్యంతో అత్యాధునిక సమగ్ర ఉక్కు కర్మాగారాన్ని కూడా సంస్థ ఏర్పాటు చేస్తోంది. అంతేకాకుండా, భారత ఉక్కు మంత్రిత్వ శాఖ నుంచి గ్రీన్ స్టీల్ సర్టిఫికెట్ పొందిన దేశంలోని మొట్టమొదటి , ఏకైక సమగ్ర ఉక్కు సంస్థగా ఏఎం/ఎన్ఎస్ ఇండియా గుర్తింపు పొందింది.

Tags:

AM/NS India Andhra Pradesh ITIs Modernization NAMTECH Nara Lokesh PM-SETU Scheme Steel Industry Skill Development Visakhapatnam ITI Cluster

Our YouTube Channel