రాష్ట్ర స్థాయి కరాటే పోటీల్లో సత్తా చాటిన గుర్రంపోడు విద్యార్థులు..!
రాష్ట్ర స్థాయి కరాటే పోటీల్లో సత్తా చాటిన గుర్రంపోడు విద్యార్థులు..!
గుర్రంపోడు, మన సాక్షి :
నల్గొండలో నిర్వహించిన 11వ తెలంగాణ రాష్ట్ర స్థాయి కరాటే ఛాంపియన్షిప్ – వారియర్ కప్ పోటీలలో గుర్రంపోడు మండల విద్యార్థులు అద్భుత ప్రతిభ కనబరిచి పతకాలు సాధించారు. జేకేఏఐ షోటోకాన్ కరాటే సంస్థ ఆధ్వర్యంలో ఆదివారం (సెప్టెంబర్ 27) ఈ పోటీలు జరిగాయి. గుర్రంపోడు మండలంలోని వివిధ పాఠశాలలకు చెందిన విద్యార్థులు కరాటేలోని పలు విభాగాల్లో రాణించి మండల కీర్తిని చాటారు.
ఈ నేపథ్యంలో గురువారం స్థానిక కస్తూరిబా గాంధీ బాలికల విద్యాలయం (కేజీబీవీ)లో ప్రత్యేక సమావేశాన్ని నిర్వహించారు. ఈ సమావేశంలో ప్రతిభ చాటిన విద్యార్థులకు వారు సాధించిన మెడల్స్ (పతకాలు), ప్రశంసా పత్రాలను ఘనంగా అందజేశారు. పోటీలలో భాగంగా ‘కాటా’ (కరాటే భంగిమల ప్రదర్శన) విభాగంలో రేపాక లింటు అత్యుత్తమ ప్రతిభ కనబరిచి ప్రథమ స్థానంలో నిలిచి బంగారు పతకాన్ని కైవసం చేసుకుంది.
స్థానిక మోడల్ స్కూల్ విద్యార్థిని మండల ఇందుమతి ‘కుమితే’ (ద్వంద్వ పోరాటం) విభాగంలో మూడవ స్థానం సాధించగా, కాటా విభాగంలో పోలేని షణ్ముఖ ప్రియా, ఆవుల అక్షిత ద్వితీయ స్థానాలు దక్కించుకున్నారు. ఎల్లో బెల్ట్ కాటా విభాగంలో కొరిమి హర్షిత మూడవ స్థానంలో నిలిచింది.కస్తూరిబా పాఠశాల విద్యార్థినులు సైతం పతకాలతో మెరిశారు.
ఎల్లో బెల్ట్ కాటా విభాగంలో టి. అఖిల, బి. పావని ద్వితీయ స్థానాలు సాధించగా.. టి. హారిక, ఓ. మమత మూడవ స్థానాన్ని, టి. రక్షిత నాల్గవ స్థానాన్ని దక్కించుకున్నారు. వైట్ బెల్ట్ కాటా విభాగంలో ఎస్కే ఇమ్రాన్, ఎస్కే ఇబ్రహీం నాల్గవ స్థానాలు సాధించి పతకాలు అందుకున్నారు.
మాజీ జెడ్పీటీసీ గాలి రవికుమార్ ఈ సందర్భంగా విజేతలను అభినందించి మాట్లాడుతూ.. ప్రస్తుత రోజుల్లో ప్రతి ఆడబిడ్డకు కరాటే ఎంతో అవసరమని పేర్కొన్నారు. ఆపద సమయాల్లో తమను తాము రక్షించుకోవడానికి, భయం లేకుండా ఆత్మవిశ్వాసంతో ముందడుగు వేయడానికి కరాటే తోడ్పడుతుందన్నారు. కరాటే నేర్చుకోవడం వల్ల శారీరక దృఢత్వంతో పాటు గుర్రంపోడు మండల విద్యార్థులలో క్రమశిక్షణ అలవడుతుందని ఆయన తెలిపారు.
రాష్ట్ర స్థాయిలో ప్రతిభ చాటిన విద్యార్థులను మండల విద్యాధికారి నోముల యాదగిరి, మోడల్ స్కూల్ ప్రిన్సిపాల్ రాగిణి, కేజీబీవీ ప్రత్యేక అధికారి దుడ్డు విజయశ్రీ, సర్పంచ్ జాల యాదయ్య, ఎస్కే సయ్యద్, పీపీఎల్ రేపాక నాగయ్య మరియు గుర్రంపోడు మండల పరిధిలోని వివిధ పాఠశాలల ఉపాధ్యాయిని ఉపాధ్యాయులు ప్రత్యేకంగా అభినందించారు. విద్యార్థులను విజేతలుగా తీర్చిదిద్దిన కరాటే శిక్షకులు రేపాక శివ, రేపాక అనురాధలను, అలాగే ప్రతిభ చాటిన విద్యార్థులను జేకేఏఐ జిల్లా ఉపాధ్యక్షులు నాగార్జున ప్రత్యేకంగా అభినందించి, భవిష్యత్తులో మరిన్ని పథకాలు సాధించాలని ఆకాంక్షించారు.
Our YouTube Channel
