రైతులకు ఆధునిక వ్యవసాయంపై అవగాహన కోసం.. నల్గొండలో వ్యవసాయ ప్రదర్శన..!
రైతాంగానికి ఆధునిక వ్యవసాయ పద్ధతులు, శాస్త్రీయ పరిజ్ఞానం, నూతన సాంకేతిక పరిజ్ఞానాన్ని పరిచయం చేయడమే లక్ష్యంగా మూడు రోజుల పాటు అగ్రిషో నిర్వహిస్తున్నట్లు మాజీ ఎమ్మెల్యే, రైతు సంఘం రాష్ట్ర ఉపాధ్యక్షులు నంద్యాల నరసింహారెడ్డి తెలిపారు.
రైతులకు ఆధునిక వ్యవసాయంపై అవగాహన కోసం.. నల్గొండలో వ్యవసాయ ప్రదర్శన..!
రైతులు, పట్టణ ప్రజలు అగ్రిషోను సందర్శించి సద్వినియోగం చేసుకోవాలి : మాజీ ఎమ్మెల్యే నంద్యాల నరసింహారెడ్డి
నల్లగొండ, మన సాక్షి :
రైతాంగానికి ఆధునిక వ్యవసాయ పద్ధతులు, శాస్త్రీయ పరిజ్ఞానం, నూతన సాంకేతిక పరిజ్ఞానాన్ని పరిచయం చేయడమే లక్ష్యంగా మూడు రోజుల పాటు అగ్రిషో నిర్వహిస్తున్నట్లు మాజీ ఎమ్మెల్యే, రైతు సంఘం రాష్ట్ర ఉపాధ్యక్షులు నంద్యాల నరసింహారెడ్డి తెలిపారు. ఈ నెల 14, 15, 16 తేదీల్లో నల్లగొండ పట్టణంలోని గడియారం సెంటర్‌లో నిర్వహించే అగ్రిషోను రైతులు, వ్యవసాయ అనుబంధ రంగాల వారు, పట్టణ ప్రజలు సందర్శించి సద్వినియోగం చేసుకోవాలని కోరారు.
గురువారం నల్లగొండలో రైతు సంఘం జిల్లా అధ్యక్షులు ముదిరెడ్డి సుధాకర్‌రెడ్డి, తుమ్మల వీరారెడ్డి, బండ శ్రీశైలం, ఎండీ హషం, పాలడుగు నాగార్జునతో కలిసి ఏర్పాటు చేసిన విలేకరుల సమావేశంలో ఆయన మాట్లాడారు. నల్లగొండలో ఈ నెల 15 నుంచి 18 వరకు జరిగే అఖిల భారత రైతు సంఘం (ఏఐకేఎస్‌) 36వ జాతీయ మహాసభలు, 41వ జీఎం కన్వెన్షన్లలో భాగంగా అగ్రిషో ఏర్పాటు చేసినట్లు వివరించారు.
125 స్టాళ్లు.. ఆధునిక పరికరాల ప్రదర్శన
ఈ నెల 14వ తేదీ ఉదయం 10 గంటలకు రాష్ట్ర వ్యవసాయ శాఖ మంత్రి తుమ్మల నాగేశ్వరరావు, జిల్లా మంత్రి కోమటిరెడ్డి వెంకటరెడ్డి అగ్రిషోను ప్రారంభించనున్నట్లు తెలిపారు. మూడు రోజుల పాటు ఉదయం 10 గంటల నుంచి సాయంత్రం వరకు ప్రదర్శన కొనసాగుతుందని చెప్పారు. మొత్తం 125 స్టాళ్లను ఏర్పాటు చేశామని, అవసరమైతే మరిన్ని స్టాళ్లు ఏర్పాటు చేసేందుకు సిద్ధంగా ఉన్నామని వెల్లడించారు.
Also Read : చెరకు టన్నుకు రూ.4,500 మద్దతు ధర కల్పించాలి.. కమిషనర్ ను కలిసిన ఎమ్మెల్యే మాణిక్ రావు
వ్యవసాయానికి ఉపయోగపడే డ్రోన్లు, ట్రాక్టర్లు, ఆధునిక యంత్రాలు, నూతన విత్తనాలు, ఎరువులు, డ్రిప్‌, స్ప్రింక్లర్‌ పరికరాలు, వివిధ సాగునీటి పద్ధతులను ప్రదర్శనలో అందుబాటులో ఉంచుతున్నట్లు పేర్కొన్నారు. వ్యవసాయ విశ్వవిద్యాలయ శాస్త్రవేత్తలు, కృషి విజ్ఞాన కేంద్రం (కేవీకే) ప్రతినిధులు రైతులకు పంటల సాగు, చీడపీడల నివారణ, పంటల తెగుళ్లపై సలహాలు, సూచనలు అందిస్తారని తెలిపారు.
నీటి కొరతను అధిగమించే సాంకేతికతపై ప్రత్యేక దృష్టి
ప్రస్తుతం వ్యవసాయ రంగంలో నీటి కొరత ప్రధాన సమస్యగా మారిందని, అందుబాటులో ఉన్న కొద్దిపాటి నీటిని సమర్థంగా వినియోగించుకునే సాంకేతికతపై రైతులకు అవగాహన కల్పించాల్సిన అవసరం ఉందన్నారు. డ్రిప్‌తో పాటు స్ప్రింక్లర్లు, జెట్‌, ఇతర సూక్ష్మ సాగునీటి పద్ధతులను ప్రదర్శనలో చూపించనున్నట్లు తెలిపారు. జిల్లాలో సుమారు 15 వేల ఎకరాల్లో సాగవుతున్న పామాయిల్‌ పంటకు నీటి సమస్య పరిష్కార మార్గాలను వివరించేందుకు పామాయిల్‌ కంపెనీలు, పతంజలి సంస్థల స్టాళ్లను కూడా ఏర్పాటు చేస్తున్నట్లు చెప్పారు.
శాస్త్రవేత్తలతో నేరుగా సందేహాల నివృత్తి
రైతులకు అవసరమైన సమాచారం, సాంకేతిక పరిజ్ఞానంతో పాటు రుణ సదుపాయాలపై అవగాహన కల్పించేందుకు సీసీ బ్యాంకు స్టాల్‌ కూడా ఏర్పాటు చేస్తున్నట్లు తెలిపారు. నర్సరీలు, హెర్బల్‌, ఆయుర్వేద ఉత్పత్తులకు సంబంధించిన స్టాళ్లు కూడా ఉంటాయని వెల్లడించారు. రైతులు తమ పంటల సమస్యలను శాస్త్రవేత్తలకు వివరించి తగిన సూచనలు పొందడంతో పాటు అవసరమైన పరికరాలు, విత్తనాలను పరిశీలించి కొనుగోలు చేయవచ్చన్నారు.
నల్లగొండకు జాతీయ స్థాయి మహాసభల అవకాశం
దేశవ్యాప్తంగా 29 రాష్ట్రాల నుంచి రైతు సంఘాల ప్రతినిధులు, రైతాంగ అనుభవజ్ఞులు, వ్యవసాయ శాస్త్రవేత్తలు నల్లగొండకు రావడం జిల్లా రైతాంగానికి మంచి అవకాశమని నంద్యాల నరసింహారెడ్డి పేర్కొన్నారు. రాష్ట్రవ్యాప్తంగా వేలాది మంది రైతులు, ముఖ్యంగా ఉమ్మడి నల్లగొండ జిల్లాకు చెందిన రైతులు ఈ కార్యక్రమాల్లో పాల్గొననున్నారని తెలిపారు. వ్యవసాయ శాఖ మంత్రి, వ్యవసాయ శాఖ ఉన్నతాధికారుల సహకారంతో వివిధ వ్యవసాయ, అనుబంధ రంగాల స్టాళ్లను ఏర్పాటు చేస్తున్నామని చెప్పారు.
Also Read : మూసీ రివర్ ఫ్రంట్ పనులపై ముఖ్యమంత్రి రేవంత్ రెడ్డి కీలక ప్రకటన..!
రాష్ట్ర రైతు సంఘం సీనియర్ నాయకుడిగా అగ్రిషో ఏర్పాట్ల బాధ్యతలను తాను పర్యవేక్షిస్తున్నట్లు తెలిపారు. రైతులకు ఉపయోగపడే ప్రతి అంశాన్ని ప్రదర్శనలో అందుబాటులోకి తీసుకువచ్చేందుకు కృషి చేస్తున్నామని పేర్కొన్నారు. వ్యవసాయాన్ని రక్షించుకోవడం, రైతాంగానికి ఆధునిక పరిజ్ఞానాన్ని చేరవేయడం లక్ష్యంగా నిర్వహిస్తున్న ఈ అగ్రిషోకు విస్తృత ప్రచారం కల్పించాలని మీడియా ప్రతినిధులను కోరారు. రైతులు మాత్రమే కాకుండా పట్టణ ప్రజలు సైతం ప్రదర్శనను సందర్శించి వ్యవసాయ రంగంలో వస్తున్న మార్పులను తెలుసుకోవాలని పిలుపునిచ్చారు. విలేకరుల సమావేశంలో రాము నాయక్ ఎండి సలీం వెంకట్ రెడ్డి, పుచ్చకాయ నర్సిరెడ్డి,నలపరాజు సైదులు, కొండ వెంకన్న, . పి సత్యనారాయణ కొండ వెంకన్న వి నారాయణరెడ్డి, తదితరులు పాల్గొన్నారు.
Our YouTube Channel
