శ్రీసిటీలో హెల్త్‌కేర్ పరిశ్రమలో భారీ పేలుడు.. ఇద్దరు మృతి.. 12 మందికి గాయాలు..!
మండలం శ్రీసిటీ ప్రత్యేక ఆర్థిక మండలి పరిధిలోని హెల్త్‌కేర్ పరిశ్రమలో శనివారం ఉదయం భారీ పేలుడు సంభవించింది.
శ్రీసిటీలో హెల్త్‌కేర్ పరిశ్రమలో భారీ పేలుడు.. ఇద్దరు మృతి.. 12 మందికి గాయాలు..!
మదనపల్లి (శ్రీసిటీ), మనసాక్షి :
తిరుపతి జిల్లా సత్యవేడు మండలం శ్రీసిటీ ప్రత్యేక ఆర్థిక మండలి పరిధిలోని హెల్త్‌కేర్ పరిశ్రమలో శనివారం ఉదయం భారీ పేలుడు సంభవించింది. పేలుడు ధాటికి పరిశ్రమ పరిసర ప్రాంతాలు ఒక్కసారిగా ఉలిక్కిపడ్డాయి. భారీ శబ్దంతో పేలుడు సంభవించడంతో పరిశ్రమలో విధులు నిర్వహిస్తున్న పలువురు కార్మికులు ప్రమాదంలో చిక్కుకున్నట్లు సమాచారం.
ప్రాథమిక సమాచారం ప్రకారం నైట్‌ షిఫ్ట్‌లో విధులు నిర్వహిస్తున్న సమయంలో పరిశ్రమలోని ఒక ఉత్పత్తి విభాగంలో పేలుడు సంభవించినట్లు తెలుస్తోంది. పేలుడు అనంతరం మంటలు చెలరేగినట్లు సమాచారం. పోలీసుల ప్రాథమిక సమాచారం ప్రకారం ఈ ఘటనలో ఇద్దరు మృతి చెందగా, 12 మంది గాయపడినట్లు వెల్లడించాయి.
ప్రమాదం జరిగిన వెంటనే పరిశ్రమ సిబ్బంది, పోలీసులు, అగ్నిమాపక సిబ్బంది సహాయక చర్యలు చేపట్టినట్లు సమాచారం. ప్రమాదంలో చిక్కుకున్న కార్మికులను బయటకు తీసుకురావడంతో పాటు గాయపడిన వారిని సమీపంలోని ఆసుపత్రులకు తరలిస్తున్నట్లు తెలుస్తోంది.
హెల్త్‌కేర్ పరిశ్రమ శ్రీసిటీ సెజ్‌లోని చెరివి గ్రామం పరిధిలో ఉంది. సంస్థకు సంబంధించిన పలు అధికారిక/ధృవీకరణ వివరాల్లో ఈ ప్రాంతం సత్యవేడు మండలంగా నమోదై ఉంది.
పేలుడుకు ఖచ్చితమైన కారణం ఏమిటి? ఉత్పత్తి విభాగంలో సాంకేతిక లోపం కారణమా? భద్రతా ప్రమాణాలు పూర్తిస్థాయిలో అమలయ్యాయా? అనే అంశాలపై అధికారుల దర్యాప్తులో స్పష్టత రావాల్సి ఉంది.
ప్రమాదానికి సంబంధించిన పూర్తి వివరాలు అధికారికంగా వెల్లడికావాల్సి ఉంది.
పరిశ్రమల్లో కార్మికుల భద్రతకు కట్టుదిట్టమైన చర్యలు తీసుకోవాలని సీఐటీయూ నాయకుడు ఎం. రమేష్‌ కోరారు. ఘటనపై సమగ్ర విచారణ జరిపి ప్రమాదానికి గల కారణాలను గుర్తించాలని, బాధ్యులపై చర్యలు తీసుకోవాలని ఆయన డిమాండ్ చేశారు.
Our YouTube Channel
