ఏపీ ప్రభుత్వంతో రూ.2,500 కోట్ల భారీ ఒప్పందం కుదుర్చుకున్న ఎస్.ఎల్.ఎన్.కాఫీ..

ఆంధ్రప్రదేశ్‌లో కాఫీ ప్రాసెసింగ్ , ఇన్‌స్టంట్ కాఫీ తయారీ రంగంలో సుమారు రూ. 2,500 కోట్ల భారీ పెట్టుబడి పెట్టేందుకు ఎస్.ఎల్.ఎన్. కాఫీ ప్రైవేట్ లిమిటెడ్ (S.L.N. Coffee) ఆంధ్రప్రదేశ్ ఆర్థికాభివృద్ధి మండలి (APEDB) తో అధికారికంగా అవగాహన ఒప్పందం (MoU) కుదుర్చుకుంది. విశాఖపట్నంలో జరిగిన సీఐఐ భాగస్వామ్య సదస్సులో (CII Partnership Summit) గౌరవ ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు సమక్షంలో ఈ ప్రకటన వెలువడింది. ముఖ్యమంత్రి ఎన్. చంద్రబాబు నాయుడు , ఎస్.ఎల్.ఎన్. కాఫీ చైర్మన్ ఎస్.ఎల్.ఎన్. సత్తప్ప ఈ ఒప్పందంపై సంతకాలు చేశారు. ఈ కార్యక్రమంలో ఎస్.ఎల్.ఎన్. కాఫీ మేనేజింగ్ డైరెక్టర్ ఎస్.ఎల్.ఎన్. విశ్వనాథన్, సీఈఓ సాహిబ్ సింగ్ కూడా పాల్గొన్నారు.

ఈ ప్రతిపాదిత పెట్టుబడిని 2035 నాటికి వివిధ దశలవారీగా అమలు చేయనున్నారు. ఇందులో భాగంగా మొదటి దశలో రూ. 690 కోట్లు, రెండో దశలో రూ. 815 కోట్లు, మూడో దశలో రూ. 995 కోట్లను వెచ్చించి వాల్యూ-యాడెడ్ ఫుడ్ , కాఫీ ప్రాసెసింగ్ రంగంలో ఆంధ్రప్రదేశ్‌ను మరింత బలోపేతం చేయనున్నారు. ‘ప్రాజెక్ట్ హొరైజాన్’ (Project Horizon) కింద రాష్ట్రంలో ఒక అత్యాధునిక ఇంటిగ్రేటెడ్ మ్యానుఫ్యాక్చరింగ్ క్యాంపస్‌ను ఏర్పాటు చేయనున్నారు. ఇందులో అధునాతన కాఫీ ప్రాసెసింగ్, ఫ్రీజ్-డ్రైడ్ , స్ప్రే-డ్రైడ్ కాఫీ తయారీ, ఎక్స్‌ట్రాక్షన్, ప్యాకేజింగ్, రీసెర్చ్ అండ్ డెవలప్‌మెంట్ (R&D) వంటి సదుపాయాలు ఉంటాయి. కేవలం తయారీ మాత్రమే కాకుండా రైతులకు మద్దతు, క్యూరింగ్ ఇన్‌ఫ్రాస్ట్రక్చర్, నైపుణ్యాభివృద్ధి , కాఫీ సెంటర్ ఆఫ్ ఎక్సలెన్స్‌ను అభివృద్ధి చేయడం ద్వారా కాఫీ విలువ ఆధారిత వ్యవస్థను పటిష్టం చేయనున్నారు.

ఈ చారిత్రాత్మక మైలురాయిపై ఎస్.ఎల్.ఎన్. కాఫీ చైర్మన్ ఎస్.ఎల్.ఎన్. సత్తప్ప స్పందిస్తూ, ఆంధ్రప్రదేశ్ ప్రభుత్వం , ఏపీఈడీబీ (APEDB) సహకారంతో అత్యాధునిక సాంకేతికత, ఆవిష్కరణలతో కూడిన భవిష్యత్ తరహా కాఫీ ఎకోసిస్టమ్‌ను నిర్మించడమే తమ లక్ష్యమని తెలిపారు. కాఫీ వినియోగం పెరుగుతున్న తరుణంలో ‘ప్రాజెక్ట్ హొరైజాన్’ ద్వారా అత్యంత సమీకృత సామర్థ్యాలను పెంపొందించడం ఎంతో కీలకమని ఎస్.ఎల్.ఎన్. కాఫీ సీఈఓ సాహిబ్ సింగ్ పేర్కొన్నారు. ఈ ప్రాజెక్ట్ ద్వారా 2035 నాటికి ఆంధ్రప్రదేశ్‌లో పెద్దఎత్తున ఉపాధి అవకాశాలు కల్పించడంతో పాటు సరఫరా గొలుసు (supply-chain), అనుబంధ వ్యాపారాలకు మెరుగైన అవకాశాలు సృష్టించడమే లక్ష్యంగా ముందుకు సాగుతున్నట్లు కంపెనీ వెల్లడించింది.

Tags:

Andhra Pradesh Economic Development Board CII Partnership Summit Instant Coffee Manufacturing N. Chandrababu Naidu Project Horizon S.L.N. Coffee SLN Sathappan Visakhapatnam

Our YouTube Channel