బజాజ్ 100 ఏళ్ల ప్రస్థానం: స్వాతంత్య్ర ఉద్యమ విలువలతో అంతర్జాతీయ స్థాయికి ఎదిగిన పారిశ్రామిక దిగ్గజం
భారతదేశ ఆర్థిక పారిశ్రామిక చరిత్రలో ఒక అపురూప ఘట్టం ఆవిష్కృతమైంది. దేశంలోని ప్రతి ముగ్గురు భారతీయులలో ఒకరికి సేవలు అందిస్తున్న బజాజ్ గ్రూప్, తన 100 ఏళ్ల వ్యాపార ప్రస్థానాన్ని పూర్తి చేసుకుంది
భారతదేశ ఆర్థిక పారిశ్రామిక చరిత్రలో ఒక అపురూప ఘట్టం ఆవిష్కృతమైంది. దేశంలోని ప్రతి ముగ్గురు భారతీయులలో ఒకరికి సేవలు అందిస్తున్న బజాజ్ గ్రూప్, తన 100 ఏళ్ల వ్యాపార ప్రస్థానాన్ని పూర్తి చేసుకుంది. 148 బిలియన్ డాలర్ల మార్కెట్ క్యాపిటలైజేషన్తో దేశంలోని అతిపెద్ద వ్యాపార సమూహాలలో ఒకటిగా ఉన్న ఈ సంస్థ శతాబ్ది ఉత్సవాలను పురస్కరించుకుని ప్రధానమంత్రి నరేంద్ర మోదీ ప్రత్యేక అభినందనలు తెలిపారు. ఒక సంస్థ వందేళ్ల పాటు విజయవంతంగా కొనసాగడం అనేది, మారుతున్న కాలానికి అనుగుణంగా మారుతూ తరతరాల నమ్మకాన్ని కాపాడుకునే దాని సామర్థ్యాన్ని ప్రతిబింబిస్తుందని ప్రధాని కొనియాడారు.
గాంధీజీ దత్తపుత్రుడి అడుగుజాడల్లో
బజాజ్ గ్రూప్ ప్రస్థానం భారత స్వాతంత్ర్య ఉద్యమంతో విడదీయలేని అనుబంధాన్ని కలిగి ఉంది. మహాత్మా గాంధీ తన ఐదవ కుమారుడిగా భావించే స్వాతంత్ర్య సమరయోధుడు, సామాజిక సంస్కర్త జమ్నాలాల్ బజాజ్ 1926లో ముంబైలో ఈ గ్రూప్ను స్థాపించారు. అప్పట్లో దేశం తన కాళ్ల మీద తాను నిలబడాలనే స్వయం సమృద్ధి లక్ష్యంతో ఆయన వేసిన పునాదులే నేడు ఈ సంస్థను ప్రపంచ స్థాయికి చేర్చాయి. ప్రస్తుతం ఈ గ్రూప్లో బజాజ్ ఆటో, బజాజ్ ఫిన్సర్వ్, బజాజ్ ఫైనాన్స్ వంటి దిగ్గజ సంస్థలు ఉండగా, త్వరలో ఆరోగ్య సంరక్షణ (Healthcare) రంగంలోకి కూడా అడుగుపెడుతున్నట్లు బజాజ్ యాజమాన్యం ప్రకటించింది.
ప్రపంచ మార్కెట్లో భారతీయ ముద్ర
నేడు బజాజ్ ఆటో కేవలం భారతదేశానికే పరిమితం కాకుండా, ప్రపంచవ్యాప్తంగా టాప్ 3 టూ వీలర్ కంపెనీలలో ఒకటిగా ఎదిగింది. ఆఫ్రికా, లాటిన్ అమెరికా సహా 100 కంటే ఎక్కువ దేశాలకు ఎగుమతులు చేస్తూ భారతీయ తయారీ రంగానికి గర్వకారణంగా నిలిచింది. ఆస్ట్రియాకు చెందిన ప్రఖ్యాత కంపెనీ కేటీఎం (KTM)తో జతకట్టడం ద్వారా, భారతీయ బ్రాండ్లు అంతర్జాతీయ స్థాయిలో పోటీని ఇవ్వగలవని నిరూపించామని రాజీవ్ బజాజ్ పేర్కొన్నారు. అలాగే, ఆర్టిఫిషియల్ ఇంటెలిజెన్స్ (AI) వంటి ఆధునిక సాంకేతికతలను ఆర్థిక సేవలు అందరికీ చేరువ చేయడానికి సాధనంగా వాడుకుంటున్నట్లు సంజీవ్ బజాజ్ వివరించారు.
సామాజిక బాధ్యత – భవిష్యత్తు లక్ష్యం
వ్యాపార లాభాలు కేవలం సంస్థకే పరిమితం కాకుండా సమాజానికి కూడా మేలు చేయాలనేది బజాజ్ సిద్ధాంతం. ఈ దిశగా ‘బజాజ్ బియాండ్’ (Bajaj Beyond) కార్యక్రమం ద్వారా రాబోయే ఐదేళ్లలో 2 కోట్ల మంది భారతీయ యువతకు నైపుణ్య శిక్షణ ఉపాధి కల్పన ద్వారా సాధికారత కల్పించాలని లక్ష్యంగా పెట్టుకుంది. ఇప్పటివరకు ఈ సంస్థ చేస్తున్న సేవా కార్యక్రమాల వల్ల 10 మిలియన్ల కంటే ఎక్కువ మంది లబ్ధి పొందారు. 2047 నాటికి ‘వికసిత భారత్’ లక్ష్య సాధనలో బజాజ్ గ్రూప్ వంటి లోతైన అనుభవం ఉన్న సంస్థలు అగ్రభాగాన నిలవాలని ప్రధాని మోదీ ఆశాభావం వ్యక్తం చేశారు.
Our YouTube Channel
